«Игорь Бурконынъ Уральский диксиленди» бугунь фестивальни ачты — биринджи оларакъ санагъа чыкъмакъ шерефи тамам оларгъа къысмет олды.
Коллектив 52 йылдан берли чалыша, амма репертуарыны мунтазам суретте янъарта. Озь иджадында чалгъыджылар классик мешур нагъмелерни ве джаз янгъыравыны бирлештирелер.
Коллектив рагъбетли олгъанына ве гастроллерде кезгенине бакъмадан, Koktebel Jazz Party фестивалинде чалгъыджылар ильк сефер.
Бугуньки чыкъыш ичюн команда «шенъ дикслендлер» топламыны азырлады.
Наталья Риккер ве Валерий Сундарев тариф эттилер ки, музыкадан гъайры, оларнынъ коллективи маарифнен эм де огъраша.
«Айры алда, биз мектеплерде чалышамыз — музыкаль викториналарны ве джаз акъкъында дерслерни алып барамыз», — деп, къайд этти Сундарев.
Koktebel Jazz Party халкъара фестивали артистик Коктебель къасабасында августнынъ 20-22 куньлери кечеджек. Фестивальнинъ тешкилий комитетинде хабер эткенлери киби, мусафирлер мейдангъа кечмелери ичюн я 2021 сене августнынъ 18-недже япылгъан менфий ПЦР-тест (оны фестивальнинъ эписи куньлери косьтермек мумкюн), я 2021 сене майыснынъ 25-ден сонъ япылгъан S-акъына антителалар олмасы акъта весикъаны, я да коронавирустан ашылама япылгъаны акъкъында сертификатны такъдим этмелилер. Артистлер ве вип-мусафирлер, фестивальнинъ хадимлери ве кутьлевий малюмат васталарынынъ векиллери де керекли весикъалардан бирини такъдим этмелилер: ашылама япылгъаны акъкъында сертификат, антителалар олмасы акъта весикъа я менфий ПЦР-тест
2021 сене Koktebel Jazz Party концертлери янъы форматта кечеджек: музыкантларнынъ чыкъышларыны телевизион съемка форматында сейир этмек мумкюн олур. Фестивальнинъ яйынлавыны онынъ сайтында ве ичтимаий агъларда тапмакъ мумкюн оладжакъ. Концертлер девамында сейирджилернинъ сайысы сынъырлы олур.
Koktebel Jazz Party 2003 сене журналист Дмитрий Киселёвнинъ шахсий тешеббюси оларакъ пейда олды. Чешит сенелери фестивальни эфсаневий джаз давулджысы Джимми Кобб (АКъШ), энъ яхшы латин джазы альбомы ичюн «Грэмми» мукяфатынынъ лауреаты Гонсало Рубакальба (Куба), «Грэмми» мукяфатына дефаларджа наиль олгъан боразанджы Рэнди Брекер (АКъШ), сонъки 10 йыл девамында энъ яхшы баритон-саксофонджы Гари Смульян (АКъШ), ню-джаз йылдызлары Club Des Belugas (Алмания), дюньяда земаневий блюз санасынынъ векиллеринден бири, гитараджы Селвин Бёрчвуд (АКъШ) зиярет эттилер.
KJP-2017 тедбирининъ мусафири РФ президенти Владимир Путин олды. Фестиваль тешкиль этилювинен «Красный квадрат» адлы медиагруппа огъраша.