Адетиндже фестивальни онынъ темель къоюджысы Дмитрий Киселёв ачты. Бир шейге бакъмадан Koktebel Jazz Party адеттен тыш себатыны косьтере, 19-джы йыл бутюн дюнья джазменлери бу ерге келип, денъиз ялысында кейфиетли джаз чалалар, деп, къайд этти о.
«Кельгенинъиз ичюн сагъ олунъыз – сиз метин, энъ яхшы инсанларсыз. Шимди сиз озюнъизни авиалайнернинъ ёлджулары киби ис этесиз – сизге якъын келип, маскаларынъызны чыкъармакъ олмай, деп, хатырлатарлар. Биз Роспотребнадзор идаресининъ тевсиелерине коре чалышамыза, буны анълы шекильде, озюмиз япамыз», – деп, къайд этти Дмитрий Киселёв.
Бу сене Koktebel Jazz Party сынъырланувлар себебинден тек 300 сейирджини топлап олды.
«Сизинъ месулиетлигинъиз буюк – учь кере зияде алгъышламакъ. Бизим чалгъыджыларымыз бунъа дикъкъат айыралар», – деп, екюнледи Киселёв.
Koktebel Jazz Party халкъара фестивали артистик Коктебель къасабасында августнынъ 20-22 куньлери кечеджек. Фестивальнинъ тешкилий комитетинде хабер эткенлери киби, мусафирлер мейдангъа кечмелери ичюн я 2021 сене августнынъ 18-недже япылгъан менфий ПЦР-тест (оны фестивальнинъ эписи куньлери косьтермек мумкюн), я 2021 сене майыснынъ 25-ден сонъ япылгъан S-акъына антителалар олмасы акъта весикъаны, я да коронавирустан ашылама япылгъаны акъкъында сертификатны такъдим этмелилер. Артистлер ве вип-мусафирлер, фестивальнинъ хадимлери ве кутьлевий малюмат васталарынынъ векиллери де керекли весикъалардан бирини такъдим этмелилер: ашылама япылгъаны акъкъында сертификат, антителалар олмасы акъта весикъа я менфий ПЦР-тест
2021 сене Koktebel Jazz Party концертлери янъы форматта кечеджек: музыкантларнынъ чыкъышларыны телевизион съемка форматында сейир этмек мумкюн олур. Фестивальнинъ яйынлавыны онынъ сайтында ве ичтимаий агъларда тапмакъ мумкюн оладжакъ. Концертлер девамында сейирджилернинъ сайысы сынъырлы олур.
Koktebel Jazz Party 2003 сене журналист Дмитрий Киселёвнинъ шахсий тешеббюси оларакъ пейда олды. Чешит сенелери фестивальни эфсаневий джаз давулджысы Джимми Кобб (АКъШ), энъ яхшы латин джазы альбомы ичюн «Грэмми» мукяфатынынъ лауреаты Гонсало Рубакальба (Куба), «Грэмми» мукяфатына дефаларджа наиль олгъан боразанджы Рэнди Брекер (АКъШ), сонъки 10 йыл девамында энъ яхшы баритон-саксофонджы Гари Смульян (АКъШ), ню-джаз йылдызлары Club Des Belugas (Алмания), дюньяда земаневий блюз санасынынъ векиллеринден бири, гитараджы Селвин Бёрчвуд (АКъШ) зиярет эттилер.
KJP-2017 тедбирининъ мусафири РФ президенти Владимир Путин олды. Фестиваль тешкиль этилювинен «Красный квадрат» адлы медиагруппа огъраша.