Йоель Гонсалес-Портилья ве Сергея Головнянынъ иштираги иле Илья Филипповнынъ реберлигинде Георгий Гараняннынъ биг-бэнди бугуньки конрцертни ача. Огдеки чыкъыш ве фестиваль теэссюратлары акъкъында музыкантлар KJP черчивесинде матбуат- конференция девамында тариф эттилер.
«Биз мында булунмакътан бахтлымыз. Бу мемлекетимизнинъ энъ яхшы джаз фестиваллеринден биридир. Биз эр бир тарафтан къайгъырав дуямыз», – деп, къайд этти коллективнинъ ребери Илья Филиппов.
Группа энди 2016 сене Koktebel Jazz Partyде чыкъышта булунгъан эди. Ве о заман махсус программа такъдим этильген эди.
«Бу сене де меракълы проект оладжакъ – биз латин бестекярларынынъ музыкасыны чаламыз. Шунныъ ичюн биз дюньяда энъ яхшы перкуссионистлерден бирини давет эттик. Йоель – бу музыкада буюк мутехассыс, чюнки бутюн латин музыкасы везинлерде, перкуссияда къурула», – деп, тариф этти Илья.
Музыкантлар оларны мусафирчен къабул эткенлерини айрыджа къайд эттилер. Ве сейирджилерни къувандырмагъа сёз бердилер.
«Халкъ мемнюн оладжакъ», – дерп, ишандырдылар.
Koktebel Jazz Party халкъара фестивали артистик Коктебель къасабасында августнынъ 20-22 куньлери кечеджек. Фестивальнинъ тешкилий комитетинде хабер эткенлери киби, мусафирлер мейдангъа кечмелери ичюн я 2021 сене августнынъ 18-недже япылгъан менфий ПЦР-тест (оны фестивальнинъ эписи куньлери косьтермек мумкюн), я 2021 сене майыснынъ 25-ден сонъ япылгъан S-акъына антителалар олмасы акъта весикъаны, я да коронавирустан ашылама япылгъаны акъкъында сертификатны такъдим этмелилер. Артистлер ве вип-мусафирлер, фестивальнинъ хадимлери ве кутьлевий малюмат васталарынынъ векиллери де керекли весикъалардан бирини такъдим этмелилер: ашылама япылгъаны акъкъында сертификат, антителалар олмасы акъта весикъа я менфий ПЦР-тест
2021 сене Koktebel Jazz Party концертлери янъы форматта кечеджек: музыкантларнынъ чыкъышларыны телевизион съемка форматында сейир этмек мумкюн олур. Фестивальнинъ яйынлавыны онынъ сайтында ве ичтимаий агъларда тапмакъ мумкюн оладжакъ. Концертлер девамында сейирджилернинъ сайысы сынъырлы олур.
Koktebel Jazz Party 2003 сене журналист Дмитрий Киселёвнинъ шахсий тешеббюси оларакъ пейда олды. Чешит сенелери фестивальни эфсаневий джаз давулджысы Джимми Кобб (АКъШ), энъ яхшы латин джазы альбомы ичюн «Грэмми» мукяфатынынъ лауреаты Гонсало Рубакальба (Куба), «Грэмми» мукяфатына дефаларджа наиль олгъан боразанджы Рэнди Брекер (АКъШ), сонъки 10 йыл девамында энъ яхшы баритон-саксофонджы Гари Смульян (АКъШ), ню-джаз йылдызлары Club Des Belugas (Алмания), дюньяда земаневий блюз санасынынъ векиллеринден бири, гитараджы Селвин Бёрчвуд (АКъШ) зиярет эттилер.
KJP-2017 тедбирининъ мусафири РФ президенти Владимир Путин олды. Фестиваль тешкиль этилювинен «Красный квадрат» адлы медиагруппа огъраша.